mata-e-abru le kar ata se kuchh nahin hota
baha ho khun-e-dil to khun-baha se kuchh nahin hota

mizaj-e-dil bigad jae to phir ai mehrban suniye
jafa se kuchh nahin hota wafa se kuchh nahin hota

sar-e-maqtal tumhaare karname sab ne dekhe hain
sar-e-mimbar bahut aah-o-buka se kuchh nahin hota

zaban khul jae to sab bandishen be-sud hoti hain
qadam uth jaen to zanjir-e-pa se kuchh nahin hota