mata-e-fikr-o-nazar raha hun
misal-e-khushbu bikhar raha hun

main zindagani ke marke mein
hamesha zer-o-zabar raha hun

shafaq hun suraj hun raushni hun
salib-e-gham par ubhar raha hun

sajao raste bichhao kante
ki pa-barahna guzar raha hun

na zindagi hai na maut hai ye
na ji raha hun na mar raha hun

jo mere andar chhupa hua hai
us aadmi se bhi dar raha hun

wo mere apne hi gham the 'sabir'
ki jin se main be-khabar raha hun