mere sine mein kuchh zer-o-zabar hai
chaman mein ghaaliban waqt-e-sahar hai

chala jata hun aksar shahar walo
bayaban mein bhi mera ek ghar hai

jo chehre par nazar aati hai mere
meri rangat nahin gard-e-safar hai

koi tikta nahin dil mein ziyaada
ye goya ghar nahin hai rahguzar hai

nazar aate hain bas aamal sab ko
mere ahwal par kis ki nazar hai

agar 'anwar-shuur' aisa kare to
nazar-andaz kar dena bashar hai