mere zakhmon meri ruswai ko wapas le le
is sulagti hui tanhai ko wapas le le

ilm aae na agar kaam kisi muflis ke
aa ke mujh se meri danai ko wapas le le

ya to sach kahne pe suqraat ko mare na koi
ya to sansar se sachchai ko wapas le le

chikh utthe hain mere ghar ke ye khali bartan
ab to bazar se mahngai ko wapas le le

ya to har samt ye dahshat ke nazare na dikha
ya meri aankhon se binai ko wapas le le

ya to insan ke har zakhm ko bhar de maula
ya to duniya se masihai ko wapas le le

shahid-e-jurm ho phir bhi na lahu khaul uthe
aise khamosh tamashai ko wapas le le

bazm-e-baatil mein bhi himmat rahe haq-goi ki
ya meri taqat-e-goyai ko wapas le le