meri bayaz ko sheron se tum saja dena
main ek wahm hun mujh ko yaqin bana dena

bana ke koi kahani hamari hasti ki
nadi mein kaghzi kashti koi baha dena

bahut sambhaal ke rakkha hai main ne phulon ko
jo ho sake inhen gul-dan mein saja dena

chala gaya jo kabhi laut kar nahin aaya
main laut aaungi mujh ko zara sada dena

andhera dhundhta rahta hai meri parchhain
jale charagh to chadar mujhe odha dena

kitaben so nahin paengi mere baad kabhi
hua tu aa ke inhen loriyan suna dena

bikhar ke rah gai zarraat-e-gham mein 'shaista'
tere qalam se nai shakl ek bana dena