meri be-hauslagi is se siwa aur sahi
aur chaho to mohabbat ka sila aur sahi

yun bhi kuchh kam to na the itni bahaaron ke hujum
in mein shamil tere daman ki hawa aur sahi

mujh ko israr kahan hai ki mohabbat jaanun
aaj se mani-o-andaz-o-ada aur sahi

talab-e-dard mein dil had se guzarta kab tha
tum ne puchha tha ki aur is ne kaha aur sahi

ab to har shahar mein us ke hi qaside padhiye
wo jo pahle hi khafa hai wo khafa aur sahi

hum isi rahmat-o-zahmat ke hain aadi yarab
jaisi bhi hai isi duniya ki faza aur sahi

sabaq-e-be-gunahi tishna-e-takmil bhi tha
ek naya falsafa-e-jurm-o-saza aur sahi

aaj aap apne mahasin ka bayan kar lije
mahfil-e-tazkira-e-ahl-e-wafa aur sahi

kya zaruri hai ki andaz-e-bahaaran rakkhe
ab jo kuchh aur hai raftar-e-saba aur sahi

ab bahut shor sahi kal to koi parkhega
in sadaon mein faqiron ki nawa aur sahi

kyun na 'ali' se alai pe ghazal likhwae
ek bedadgar-e-ranj-faza aur sahi