meri be-zabani zaban ho na jae
nihan hai jo dil mein ayan ho na jae

wo mujh par kahin mehrban ho na jae
mata-e-sukun raegan ho na jae

sitaron se aage qadam rakhne walo
zamin-e-sitam aasman ho na jae

kahin meri rudad-e-dard-e-mohabbat
meri jaan teri dastan ho na jae

meri jurat-e-arz husn-e-tamanna
kahin un ke dil par garan ho na jae

adawat mazalim tasadum se 'waris'
jahannum pe jannat-nishan ho na jae