meri din ke ujalon par nazar hai
sitaron ka karishma raat bhar hai

wo hansta hai magar rukhsar nam hain
ye shayad pichhle mausam ka asar hai

kisi ki aib-jui hi kiya kar
abhi ke daur mein ye bhi hunar hai

yahan ke sare mausam ek se hain
yahi is shahr ki taza khabar hai

sipahi jang se kab lautte hain
wo koi aur hai zinda agar hai

akela raat ko din kar raha hun
meri gardish mein shamil har bashar hai

ye jugnu kal ka suraj dewta hai
magar ye tirgi par munhasir hai

khuda to ek hai lekin suna hai
zamana ek ke aage sifar hai