meri surat mein mera yar hai allah allah
mere dil mein mera dildar hai allah allah

kya hi taswir bani hai ye aha ha ha ha
is mein aapi wo numudar hai allah allah

shakl-e-adam ke siwa aur na bhaya naqsha
sare aalam mein ye izhaar hai allah allah

mera jism aur meri jaan hai wahi jaan bilkul
main kahun kya ki main hun yar hai allah allah

masti-e-har-do-jahan hai dil-e-adam se ayan
yahi behosh to hoshyar hai allah allah

jis ko nisbat ho payambar ki wahi ho aagah
meri baaton mein jo asrar hai allah allah

khaka murshid ka hawa mein to hua yar ayan
ye ajab faiz ka darbar hai allah allah

qissa qarnon mein na tai hota wo dam-bhar mein hua
fazl murshid ka ye izhaar hai allah allah

shah-e-'mardan' na koi aur na khadim na safi
shakl-e-ahmad ka ye izhaar hai allah allah