mohabbat pe shayad zawal aa raha hai
ki ab zindagi ka sawal aa raha hai

faza mahki mahki hai sehn-e-chaman ki
jo aaj ek yahan gul-misal aa raha hai

karun kis tarah un se tark-e-talluq
mujhe un ke dil ka khayal aa raha hai

ye kis ke tasawwur mein ai jaan-e-arman
tujhe bhi sar-e-bazm haal aa raha hai

guzar sa gaya saneha kya chaman mein
gulon par jo rang-e-malal aa raha hai

ye dasht-e-hawas hai jafaon ki duniya
idhar kyun hujum-e-ghazal aa raha hai

wo bol utthe dekha jo aashiq ko aate
idhar koi aashufta-haal aa raha hai

'zafar' ye hai us but ki yaadon ka sadqa
shab-e-hijr lutf-e-visal aa raha hai