mujh mein koi mujh jaisa ho aisa bhi ho sakta hai
ya phir koi aur chhupa ho aisa bhi ho sakta hai

us ke hath mein ghubbare the phir bhi bachcha gum-sum tha
wo ghubare bech raha ho aisa bhi ho sakta hai

ek risala padhte padhte us ki aankhen bhar aain
us mein mera sher chhapa ho aisa bhi ho sakta hai

ambar bhi nila nila hai dariya bhi nila nila
un donon ne zahr piya ho aisa bhi ho sakta hai

sahra mein jab pyas lagi to meri wahshat ne socha
qais ne khud ka khun piya ho aisa bhi ho sakta hai

jis ki khatir beach safar mein us ne mujh ko chhoda tha
wo bhi us ko chhod gaya ho aisa bhi ho sakta hai