mujh qabr se yar kyunke jawe
hai sham-e-mazar kyunke jawe

rahta hai raqib nit tere sang
chhati ka pahad kyunke jawe

hairan hue bas-ki munh tera dekh
gulshan se bahaar kyunke jawe

hai hijr ki raat sansanati
nagin se funkar kyunke jawe

nit hai mera kina us ke dil mein
patthar se sharar kyunke jawe

kis wajh uthe wo munh se ye dil
gulshan se hazar kyunke jawe

gulzar ko fasl-e-gul mein aashiq
pai lala-e-dagh-dar kyunke jawe

hai bazm buton se shaikh mahrum
jannat mein himar kyunke jawe

munh se tere sarke zulf kis wajh
gulzar se mar kyunke jawe

kyunkar karun zabt-e-ah qatil
ghayal se pukar kyunke jawe

jita hai usi gali mein 'uzlat'
jab ji diya haar kyunke jawe