mujh se ab saf bhi ho ja yunhi yar aap se aap
jis tarah hai teri khatir mein ghubar aap se aap

kab kaha aatish-e-furqat se jalaya tu ne
hain mere nala-e-dil saiqa-bar aap se aap

khar tadbir hai pesh-e-gul-e-taqdir abas
waqt par bagh mein aati hai bahaar aap se aap

donon aalam mein agar ek nahin shoabada-baz
jama kyun kar hue azdad ye chaar aap se aap

nahin aata jo wo khurshed mere ghar mein na aae
subh ho jaegi aakhir shab-e-tar aap se aap

kuchh shikayat nahin ishq-e-kamar-e-nazuk ki
ho gaya hun main sanam zar-o-nazar aap se aap

o wajud-e-chaman-ara-e-azal ke munkir
khud-bakhud gul hue maujud na khar aap se aap

surkh poshak pahan kar wo sahi qad jo gaya
jal uthe sarw-e-chaman misl-e-chinar aap se aap

zulf ko chhu ke pada hai jo bala mein ai dil
kat khata hai kisi ko koi mar aap se aap

kuchh teri tegh-e-jafa ki nahin taqsir ai gul
surat-e-ghuncha mera dil hai figar aap se aap

ghair ka munh hai ki le bose tere o zalim
nilgun ho gae honge ye ezar aap se aap

nala-kash misl-e-jaras kyun hai abas ai majnun
sabr kar aaegi jammaza-sawar aap se aap