na masjid hai koi na charch hai na koi mandir hai
agar ghar hai kahin us ka to tere dil ke andar hai

zamane ki nazar ko wo bhala aae nazar kaise
na us ka rang hai na rup hai na koi paikar hai

parindon mein chahakta hai gulon mein wo mahakta hai
hai us ki hi adakari jo ye qudrat ka manzar hai

main hindu hun musalman tum ye hain insan ki baaten
wo hai khaliq sabhi ka us ke aage sab barabar hai

hai andaza mujhe aage safar mushkil bahut hoga
magar jab ham-safar tu hai to phir kis baat ka dar hai