na puchh hijr mein jo kuchh hua hamara haal
jise na ishq ho wo jaane kya hamara haal

yaqin hai ki kahenge wo ham-safiron se
qafas mein dekh gai hai saba hamara haal

ajab hai is ka jo ab tak nahin suna us ne
fasana-e-sar-e-bazar tha hamara haal

gila yahi hamein qasid se hai ki us gul ko
na khat diya na zabani kaha hamara haal

kabhi to ghash pe ghash aae kabhi lagi hichki
tere firaq mein kya kya hua hamara haal

kahan talak na haya degi rukhsat-e-guftar
kabhi to puchhega wo mah-laqa hamara haal