na rahguzar mein thi teri na kaenat mein thi
safar ki sari saubat meri hayat mein thi

na jaane kitne hi manzar the naqsh aankhon mein
hamari soch ki manzil kisi ki zat mein thi

mujhe kahan se kahan le gai zara dekho
wo ek tanz ki khushbu jo us ki baat mein thi

hamein jo phul banaya to dete khushbu bhi
hamari mitti ai but-gar tumhaare hath mein thi

abhi to sarhad-e-sahil pe tha qadam us ka
ajib sansani lekin hamari zat mein thi

mere badan ki hararat bhi le gai 'paikar'
wo kali raat jo barson se meri ghat mein thi