nahin karti asar fariyaad meri
koi kis tarah dewe dad meri

fughan-e-jaan-gusil rakhta hun lekin
nahin sunta mera sayyaad meri

tu ai paigham-bar jhuti hi kuchh kah
ki khush ho khatir-e-nashad meri

main tujh ko yaad karta hun ilahi
tere bhi dil mein hogi yaad meri

nahin hota muqayyad main kisi ka
tabiat hai bahut aazad meri

udhar ai 'mushafi' kya dekhta hai
ghazal sun aa mere ustad meri