nai thokar lagegi to sambhalna sikh lenge hum
hisar-e-bebasi se bhi nikalna sikh lenge hum

badi chahat se apne rang teri samt bheje the
nae rangon ki chahat ko kuchalna sikh lenge hum

abhi to bas munderon tak tumhaari dhup aai hai
dhalega din to us ke sath dhalna sikh lenge hum

tariqa kuchh naya tum soch rakhna mat dene ka
usi asna mein koi chaal chalna sikh lenge hum

kai mausam rahe hain nauha-khwan is barf-jaani par
so ab to sard aahon par pighalna sikh lenge hum

hue mismar to ab 'saima' ye soch baithe hain
hawa ka dekh kar ke rukh badalna sikh lenge hum