naz-e-beganagi mein kya kuchh tha
husn ki sadgi mein kya kuchh tha

lakh rahen thin lakh jalwe the
ahd-e-awargi mein kya kuchh tha

aankh khulte hi chhup gai har shai
aalam-e-be-khudi mein kya kuchh tha

yaad hain marhale mohabbat ke
hae is bekali mein kya kuchh tha

kitne bite dinon ki yaad aai
aaj teri kami mein kya kuchh tha

kitne manus log yaad aae
subh ki chandni mein kya kuchh tha

raat-bhar hum na so sake 'nasir'
parda-e-khamushi mein kya kuchh tha