ne amiron mein ne waziron mein
ishq ke hum to hain faqiron mein

koi aazad ho to ho yaro
hum to hain ishq ke asiron mein

banda-e-ishq haq hai apne yahan
taj-daron mein takht-giron mein

furqat-e-yar ki bhari hai bu
nala-ha-e-nai o nafiron mein

zan-e-duniya murid kis ki nahin
hum bhi is qahba ke the piron mein

ab to khamosh hain qafas mein kabhi
naghma-sanjaan the ham-safiron mein

hum ko tu wajib-ul-wajud mila
hum kabiron mein hum saghiron mein

kunj-e-uzlat mein yar ko paya
ne qalilon mein ne kasiron mein

shukr-e-haq kijiye ki hai 'matam'
apne dildar dil-paziron mein