nikalo koi to surat ki tirgi kam ho
hamara ghar hi jala do jo raushni kam ho

hamare ahd ko ras aa gai wo baad-e-sumum
ki jis mein maut ziyaada ho zindagi kam ho

zamane kaise tujhe apni rah par lae
hum ahl-e-ishq ki kaise ye bebasi kam ho

kisi tarah to numaish ka ye nasha utre
kisi tarah to dikhawe ki zindagi kam ho

ye kya hamesha wafa-o-khulus ki baaten
kuchh aisi baat karo jo kahi suni kam ho

koi jatan to karo dosto bulao use
meri nigah ki us ki ye pyas hi kam ho

tumhaara mera ye rishta ajib hai ki jahan
na dosti hi ghate aur na dushmani kam ho