nikhat-o-nur ka sailab tha chaaron jaanib
main akela tha mera khwab tha chaaron jaanib

wasl ka nashsha rag-o-pai mein samundar jaisa
ek badan surat-e-mahtab tha chaaron jaanib

ham-rahi ne teri khole the rumuz-e-hasti
aankh bhar manzar-e-shadab tha chaaron jaanib

tha samaat pe wahi fiqron ka bojhal shab-khun
main bhi tha halqa-e-ahbab tha chaaron jaanib

main kahan kasa-e-ulfat liye phirta 'aslam'
zar-e-ikhlas hi kamyab tha chaaron jaanib