nind aankhon mein samo lun to siyah raat kate
ye zamin odh ke so lun to siyah raat kate

qatra-e-ashk bhi lau dete hain jugnu ki tarah
do ghadi phut ke ro lun to siyah raat kate

rone-dhone se nahin ugta khushi ka suraj
qahqahe hont pe bolun to siyah raat kate

aankh na-dida manazir ke tajassus ka hai nam
motiyan aankh mein rolun to siyah raat kate

karb-e-tanhai meri ruh ka karti hai singhaar
zahr ehsas ka gholun to siyah raat kate