nur-e-mah-e-asmani aur hai
dagh-e-dil ki zau-fishani aur hai

jab kali koi khili aai sada
chand din ki zindagani aur hai

surkh aansu hain ye jam-e-chashm mein
ye sharab-e-arghawani aur hai

ishq mein tesha-zani chalti nahin
kohkan ye pahalwani aur hai

dair-o-kaba ke jahan parde nahin
wo makan-e-la-makani aur hai

ai falak tujh mein kahan tha ye shuur
us sitamgari ka bani aur hai

abr-e-baran mein kahan sailab ye
chashm-e-giryan ki rawani aur hai

zindagi jis se ki ho zer-o-zabar
wo nigah-e-dil-sitani aur hai

rah-e-ulfat mein jo ho jae shahid
wo hayat-e-jawedani aur hai

ek hain sab kafir-o-momin yahan
mai-kada ki hukmarani aur hai

shairi se uns-e-nahaq ho gaya
mera pesha khandani aur hai

aur bhi yun to sukhan-dan hain bahut
teri 'jauhar' khush-bayani aur hai