padi wo zad ki nigahon ka hausla tuta
tumhaare aks ki jhilmil se aaina tuta

zamin shaq hui aankhon mein bhar gaya suraj
hamare sar pe achanak wo hadisa tuta

gajar ka shor azan ki pukar kya kahiye
khuda se mere takallum ka silsila tuta

hamari fikr had-e-asman se aage thi
magar kabhi na riwayat se wasta tuta

taghayyuraat ki rau kab ruki hai roke se
har ek daur mein lamhon ka zawiya tuta