pahle har lafz toliye sahib
phir zaban apni kholiye sahib

kuchh to hamraaz ka bharam rakhiye
band mutthi na kholiye sahib

shakhsiyat ka lihaz to rakhiye
narm lahje se boliye sahib

mere saghar mein aks-e-jalwa hai
dekh kar zahr gholiye sahib

kho na jae kahin waqar apna
be-zarurat na boliye sahib

band kije zaban chup rahiye
aur aage na boliye sahib

jo 'ziya' ko charagh-pa kar de
wo sahifa na kholiye sahab