parinde aazmae ja rahe the
paron se ghar banae ja rahe the

kisi sahra se aati thin sadaen
kahin pedon ke sae ja rahe the

gharon se log hijrat kar rahe the
charaghon ko bujhae ja rahe the

purane ped katte ja rahe the
nae paude lagae ja rahe the

kahin ma-baad hum ne aankh kholi
hamein sapne dikhae ja rahe the

mohabbat na-mukammal rah gai thi
purane khat jalae ja rahe the

udhar suraj saron par aa raha tha
idhar jismon se sae ja rahe the

ajab wo saneha tha chhod kar jab
sabhi apne parae ja rahe the