patthar nazar thi waiz-e-khana-kharab ki
tuti hai kya tadaq se botal sharab ki

kuchh aasman ne khak udai pas-e-fana
kuchh tum ne ai buto meri mitti kharab ki

pi kar na zabt waiz-e-kam-zarf se hua
kya apne sath mai ki bhi mitti kharab ki

kanta hun bagh mein to main bijli hun charkh par
ye rang-e-laghari hai wo shakl iztirab ki

bu-e-sharab aati hai har ek nafas ke sath
pahlu mein dil hai ya koi botal sharab ki

lail-o-nahaar bhi hain hasinon ke waste
din aaftab ka hai to shab mahtab ki

mere gunah jo chashm-e-karam mein sama gae
aankhen jhuka ke rah gai mizan hisab ki

aai jo ruh paikar-e-khaki mein ai 'wasim'
ghabra ke bol uthi meri mitti kharab ki