pukarte pukarte sada hi aur ho gai
qubul hote hote har dua hi aur ho gai

zara sa ruk ke do-ghadi chaman pe kya nigah ki
badal gae mizaj-e-gul hawa hi aur ho gai

ye kis ke nam ki tapish se par par jal uthe
hatheliyan mahak gain hina hi aur ho gai

khizan ne apne nam ki rida jo gul pe dal di
chaman ka rang ud gaya saba hi aur ho gai

ghurur-e-aftab se zamin ka dil saham gaya
tamam barishen thamin ghata hi aur ho gai

khamoshiyon ne zer-e-lab ye kya kaha ye kya suna
ki kaenat-e-ishq ki ada hi aur ho gai

jo waqt mehrban hua to khar phul ban gae
khizan ki zard zard si qaba hi aur ho gai

waraq waraq 'alina' hum ne zindagi se yun ranga
ki katib-e-nasib ki raza hi aur ho gai