qadam sau man ke lagte hain kamar hi tut jati hai
koi ummid jab bar aati aati tut jati hai

dariche band zehnon ke nahin khulte hain taqat se
laga ho zang tale mein to chabi tut jati hai

teri ulfat mein aisa haal hai jaise koi machhli
nigal leti hai kanta aur laggi tut jati hai

jidhar ke ho udhar ke ho raho dil se to behtar hai
ki lota be-tali ka ho to tonti tut jati hai

akad kar bolne wale na ho gar tan aate mein
tawe se qabl hi hathon mein roti tut jati hai

chawanni ke na tudwane pe hum se ruthne wale
kahan hai tu ki aa ab sau ki gaddi tut jati hai