qarar dil ko mila tere muskurane se
bani thi jaan pe meri tere ruth jaane se

tasalli jhuti na de dil mein kya hai ye kah de
ye khwab lamhe chura waqt ke khazane se

sunahri ghadiyan bhi aakhir to bit jati hain
ye qaid hongi faqat lab pe baat aane se

ye rangin subh chaman-dar-chaman hain khilte phul
tu aa gaya to hue din bhi ye suhane se

koi to 'fatima' sun le jo aap-biti hai
sabaq milega unhen mere is fasane se