raaz-e-dil fash kiya karte ho kya karte ho
nam se mere haya karte ho kya karte ho

roz iqrar-e-wafa karte ho kya karte ho
zakhm-e-dil phir se hara karte ho kya karte ho

tum se mansub hai ek ahd-e-wafa ka iqrar
tum bhi tauhin-e-wafa karte ho kya karte ho

shisha-e-dil ke baratne ka saliqa sikho
tum to bas tod diya karte ho kya ho

shauq ko pahle zara had se siwa hone do
dard ko had se siwa karte ho kya karte ho

ishwa-e-jaan-talabi morid-e-ilzam na ho
mujh se kahte raho kya karte ho kya karte ho

har ghadi us lab-e-shirin ka tasawwur 'akhgar'
talkh jine ka maza karte ho kya karte ho