rang par jab wo bazm-e-naz aai
hum uthe le ke dard-e-tanhai

kis se puchhen tilism-e-hasti mein
hum tamasha hain ya tamashai

tha gham-e-ishq jaan-gudaz magar
kuchh usi gham ne ki masihai

hae kis sadgi se sikha hai
husn ne ehtimam-e-ranai

aakhir-e-shab zaban-e-shama pe hai
dastan-e-hujum-e-tanhai

chand khunin-jigar hue ruswa
muskuraya chaman bahaar aai

chup rahe hum to khun hua dil ka
baat ki hai to aankh bhar aai

hae is daur-e-aql-o-danish ne
kar diya aadmi ko saudai

hum chaman mein na the to khud hi 'rawish'
bu-e-gul dasht tak chali aai