ranj-e-duniya fikr-e-uqba jaane kya kya dil mein hai
zindagi do din ki apni saikdon mushkil mein hai

rah-e-ulfat mein bahut kuchh khak bhi chhani magar
meri jaanib se ghubar ab tak kisi ke dil mein hai

wo jafa-pesha jafa-ju hai jafa us ki sarisht
jis ko kahte hain wafa wo mere aab-o-gil mein hai

tah-nashin ho kar mili mauj-e-hawadis se najat
kashti-e-umr-e-rawan ab daman-e-sahil mein hai

sakht-jaani se meri pala agar padta use
dekhta phir zor kitna bazu-e-qatil mein hai

apni apni ga rahe hain donon shaikh-o-barahman
dair-o-kaba mein kahan hai jo harim-e-dil mein hai

marhale har roz insan ko nae aate hain pesh
aaj us manzil mein hai kal dusri manzil mein hai

kuchh to pas-e-husn kuchh un ki nazar ka samna
wo zaban par la nahin sakta jo mere dil mein hai

jaanta hun go maal-e-hazrat-e-adam magar
ku-e-jaanan ki tamanna phir bhi mere dil mein hai

dekhiye aaina-e-piri mein phir bachpan ka haal
ahd-e-mazi ki jhalak kuchh ahd-e-mustaqbil mein hai

soch kar fariyaad ka anjam main khamosh hun
warna ab bhi quwwat-e-fariyaad mere dil mein hai

hai shikast-e-be-sutun mear-e-istedad-e-ishq
kohkan ka nam fard-e-jauhar-e-qabil mein hai

ishq-e-majnun ne kuchh uncha kar diya meyar-e-husn
warna laila ki haqiqat parda-e-mahmil mein hai

koi hai saghar-ba-kaf koi surahi-dar-baghal
tishna-kaam ab tak magar 'shoala' teri mahfil mein hai