raqs mein aaj chaarpai hai
khatmalon ki baraat aai hai

aaj bistar zamin par kar len
ye chughul-khor chaarpai hai

aaen 'ghaalib' bhi to kahan baithe
tat hai ghar mein na chatai hai

us ne chappal bhi chum kar mari
ye bhi andaz-e-dil-rubai hai

dekh kar mujh ko hans pade hain wo
kis qadar dard-ashnai hai

muskuraate hain galiyan sun kar
ye siyasat ki be-hayai hai

basi roti hi waqt par de do
ye bafati bhi ghar jamai hai

'be-takalluf' rakhenge yaad sabhi
jo hazal aap ne sunai hai