ras aai bhi to aai shan-e-mastana mujhe
sari duniya kah rahi hai un ka diwana mujhe

dil bhi kashana hai tera us ki diwani na dekh
phir jalana hai charagh-e-mehman-khana mujhe

ghuncha-e-nauras se dhalne ko hai tahrik-e-hayat
gudgudati hai shamim-e-subh-e-mai-khana mujhe

ishq ki waraftagi bhi ek tilism-e-raaz hai
khud haram ne bakhsh di jagir-e-but-khana mujhe

al-madad ai tabnaki-e-jamal-e-ru-e-dost
nagawar-e-did hain wo be-hijabana mujhe

dur se nazren bacha kar jab guzarti hai bahaar
gulsitan malum hota hai aza-khana mujhe

khud meri hasti hai 'mahir' aalam-e-anwar-e-husn
jalwa-gah-e-dost hun samjho khuda-khana mujhe