ratjage mein bhi ek khumari hai
khwab halka hai nind bhaari hai

dekho kis ka nasib badlega
sanp ne kenchuli utari hai

hosh-mandon ke is kharabe mein
hum diwanon ka raqs jari hai

ab use kaun dekh sakta hai
hum ne us ki nazar utari hai

khwab ka dam hum lagaenge
umr ek jagte guzari hai

ab to shadi ki fikr hai us ki
ek gudiya se ishq jari hai

ye junun thik hai magar 'wahid'
hosh ki apni zimmedari hai