reg-zar aankhon mein be-khwabi ke hain
din yahi basti ki gharqabi ke hain

phul sath-e-ab par khilne lage
han yahi ayyam betabi ke hain

jam rahi hain tan pe kai ki tahen
khwab aankhon mein guhar-yabi ke hain

wadiyan ab barf se dhak jaengi
shab to shab din bhi giran-khwabi ke hain

hai zamin ki tirgi ka samna
marhale aage falak-tabi ke hain

kyon hawaen aag barsati nahin
dur tak aasar shadabi ke hain