roz-o-shab ka nisab lagti hai
zindagi ek kitab lagti hai

dosto kya tumhein meri surat
khasta-haal-o-kharab lagti hai

ishq mein umr jo guzari hai
ab sunahra sa khwab lagti hai

kya kaha wo sin-e-bulughat mein
aur bhi pur-shabab lagti hai

ye teri aankh mein chhupi masti
mujh ko mauj-e-sharab lagti hai

gidgida kar dua jo mangi thi
kya tumhein mustajab lagti hai

jis mein us ki na yaad ho 'shafi'
aisi saat azab lagti hai