rukhsat hui bahaar nazare chale gae
daman tera chhina ki sahaare chale gae

aaya na lab pe harf-e-shikayat bhi bhul ke
jaise bhi apni guzri guzare chale gae

sab kuchh lutaya phir bhi tujhe pa sake na hum
bazi har ek gam pe haare chale gae

sine mein soz aankh mein aansu liye hue
mahfil se teri dard ke mare chale gae

hans hans ke hum ne zulm sahe hain tere liye
mar mar ke bhi tujhi ko pukare chale gae

maujon se ai 'tabassum' abhi aur khel le
kashti se teri dur kinare chale gae