ruswai ke khayal se dar to nahin gae
wo rasta badal ke guzar to nahin gae

tark-e-talluqat se tum ko bhi kya mila
hum bhi gham-e-firaq se mar to nahin gae

hum pe taras na kha hamein lachaar dekh kar
hum tut bhar gae hain bikhar to nahin gae

dariya ke par utar ke jalai hain kashtiyan
nakaam laut ke kabhi ghar to nahin gae

daur-e-khizan mein sabza-o-shabnam kahan 'zafar'
palkon pe aa ke ashk thahar to nahin gae