sab yahan dhoka hai hum tum kuchh nahin
zindagi mein hain sabhi gham kuchh nahin

khelte hain karb ke tufan se
jaante hain hum tabassum kuchh nahin

khun ugalta zindagi ka saz hai
jis ko kahte hain tarannum kuchh nahin

ek pal mein ruh rukhsat ho gai
jism ke andar tasadum kuchh nahin

maut ne luti hai meri zindagi
khun ki maujon mein talatum kuchh nahin

bujh gai ummid ki kirnen sabhi
mahr ko ab mah-o-anjum kuchh nahin

zindagi 'tauqir' aisa hai parind
jis ke par hain chonch aur dum kuchh nahin