sar jo rahta hai mera rone se aksar bhaari
panw par rakhta nahin un ke samajh kar bhaari

be-takalluf harakat kuchh jo falak karta hai
aaj-kal mujh pe sitara hai muqarrar bhaari

ghair ke samne yun mujh pe yakayak na uthe
dast-e-nazuk mein tere kash ho zewar bhaari

aur kuchh hain tere dil-band ke tewar ba-khuda
aaj ki raat har ek but ko hai aazar bhaari

apne ghar mein hai mujhe roz musibat 'arif'
tin din gor mein hote hain muqarrar bhaari