sar pe aafat hai musibat hai bacha le mujh ko
ladkhadate hain qadam koi sanbhaale mujh ko

main masaib mein bhi jine ki dua mangunga
log kahte hain ki duniya se utha le mujh ko

main wo gauhar hun jo sine mein daba hun us ke
koi mallah samundar se nikale mujh ko

main kamata hun magar ab bhi maza dete hain
mere man bap ke hathon ke niwale mujh ko

ek bade arse se main ruth gaya hun khud se
ho sake garche koi aa ke mana le mujh ko

naz aaega muqaddar pe mujhe tab 'ahmad'
jab koi aa ke nasib apna bana le mujh ko