sawad-e-shahr mein thodi si ye jo jannat hai
hamare ahd ke namrud ki wirasat hai

tamam mulk mein us ki ghazal ki shohrat hai
hamare shahr mein ek shakhs shad-o-hasrat hai

ghazal ghazal nahin fan ki azim daulat hai
ye 'mir'-o-'ghaalib'-o-'iqbaal' ki amanat hai

na moajiza koi ilham na risalat hai
yazid-o-shimr hain lakhon khuda ki qudrat hai

abhi hai der zara dhup ke utarne mein
fasil-e-shab se bhi unchi hisar-e-zulmat hai

ajib waqt hai ab doston ke chaqu ko
mere qalam ki nahin ungliyon ki hasrat hai