saya sa ek khayal ki pahnaiyon mein tha sathi koi to raat ki tanhaiyon mein tha har zakhm mere jism ka mera gawah hai main bhi sharik apne tamashaiyon mein tha ghairon ki tohmaton ka hawala baja magar mera bhi hath kuchh meri ruswaiyon mein tha tute hue badan pe lakiron ke jal the qarnon ka aks umr ki parchhaiyon mein tha girdab-e-gham se kaun kisi ko nikalta har shakhs gharq apni hi gahraiyon mein tha naghmon ki lai se aag si dil mein utar gai sur rukhsati ke soz ka shahnaiyon mein tha 'rasikh' tamam ganw ke sukhe pade the khet barish ka zor shahr ki angnaiyon mein tha