sayon se lipat rahe the sae
dil phir bhi faza mein jagmagae

be-sarfa bhatak rahi thin rahen
hum nur-e-sahar ko dhund lae

ye gardish-e-rozgar kya hai
hum sham-o-sahar ko dekh aae

har subh teri nazar ka partaw
har sham teri bhawon ke sae

hai fasl-e-bahaar ka ye dastur
jo aae chaman mein muskurae

kya chiz hai ye fasana-e-dil
jab kahne lagen to bhul jae

tum hi na samajh sake meri baat
ab kis ki samajh mein baat aae

suni rahi intizar ki raat
ashkon ne bahut diye jalae

wo din jo bahaar-e-zindagi the
wo din kabhi laut kar na aae