saza dena hai to aisi saza de
kisi se ishq karna hi sikha de

mujhe phir kuchh duaen mangni hain
ufuq se phir koi tara gira de

wo tujh ko aazmana chahta hai
tu apne sabr se us ko hara de

agar jaana hai to jae wo lekin
sabab to chhod jaane ka bata de

banaun koi to aisi khabar mein
khabar us ko jo andar tak hila de

bas itni raushni ki aarzu hai
jo mere sae se mujh ko mila de

main khud se baat ji bhar kar sakun bas
mujhe itni hawa itni faza de