saza mili hai teri mukhtasar rifaqat ki
tamam umr tere hijr ki hifazat ki

utarne bhi na di shahr ke makinon ne
teri gali se lipat kar thakan masafat ki

tamam umr jise meri chup ne chaha tha
wo mujh se puchh raha tha kabhi mohabbat ki

yahi bahut hai ki talwar se nahin mara
mere qabile ne mujh par badi inayat ki

main tere ishq mein sahra-nawardi kya karta
abhi to panw mein zanjir thi zarurat ki