shahr-adab ki jis ghadi jagir ban jaenge hum
karwan-e-dil ke phir to 'mir' ban jaenge hum

meri furqat mein kabhi jo tum ne dekhe the janab
un hasin khwabon ki ek tabir ban jaenge hum

tabsira jab bhi karega koi mulk-o-qaum par
to qalam qirtas aur tahrir ban jaenge hum

jag jaega shuur-e-agahi jab tum mein to
khitta-e-hasti ki ek tanwir ban jaenge hum

azm le ke dil mein utthenge salahuddin sa
aur umr ka nara-e-takbir ban jaenge hum

jabiron ke zulm ko 'sabir' mitane ke liye
haidar-e-karrar ki shamshir ban jaenge hum